Swara-Swara Saka Langit

swara-swara saka langit

tumurun ginawa derese banyu udan

nalika petir muni sesautan

nalika gludhug gumludug magenturan

angin prahara lesus kadya pinusus

jagad gonjang ganjing kelap kelap

swara-swara saka langit

ngongasake kamurkan

ngedir-edirake kajuligan

ngambra ambra kesrakahan

ngegung-egungake kasudiran

mabuk kamulyan mendem kasugihan

swara-swara saka langit

: bebendhu apa kanugrahan !? *)

Sda, 2012

*) gurit iki rinakit nalika partai-partai

pada dadi tumbak cucukan.

Iki Sacuwil Crita Ing Panguripan

nalika banyu iki tumetes ketes saka punjere jagad

bareng tumurune bun-bun ratri

ing wengi kang nglangut. Sepi

iki sacuwil crita ing panguripan

ora beda kayadene musa nuthukake tekene

ing watu lemah cengkar

kang sakala muncrat sumbering banyu suci

kang nguwatake sanubari lan mbarokahi bumi nganti saiki

lan nalika banyu iki diwadhahi nganggo guci

minangka toya tirta amerta her perwita sari

peparinge illahi robbi kang tansah dibekteni

ora beda kayadene para dewa lan naga

ngebur jagad ngganggo pethiting mahameru

kang sakala muncrat sumbering banyu suci

kang nguwatake sanubari lan mbarokahi bumi nganti saiki

madya ratri, peb 2012

Wengi Iki Aku Wus Sarasa Karo Slira-Mu

wengi iki aku wus sarasa karo slira-Mu

mecaki endah padhang sumilake langit

nglaras edi penining gendhing-gendhing pangajabsih

ngaras cahyane rembulan purnama kang lagi ndadari

lan uber-uberan rebutan abyore lintang – lintang ing tawang gumantungan

wengi iki aku ora bisa pisah karo slira-Mu

senadyanta wengi iki amung sadhela

senadyanta wengi iki amung sakedheping netra

wengi iki mung dadi dhuwekku lan dhuwek-Mu

maulud 1433

Tetembangan Panglipuring Ati

udan mangsa rendheng

kang wutah saka mendhung peteng

tan kasat ing pandeleng

ora kayaa iki dina

dina-dina kang kebak crita

udan mangsa rendheng, kang wutah saka mendhung peteng

nyebabake lemah kang dak pidak katut ilining banyu bena

aku banjur ngudarasa :

( ing satengahing bena, pada iki isih tumancep ing bantala gondhelan pepenget pepeling lan pangentha-entha, sanadyanta langit iki rubuh yen gusti durung marengake ora bakal jagad iki musna keblebeg lumebere letheke ludira, kabesmi mangalad-alad kobare geni angkara saka nala)

mendhung peteng ngembuleng ing waliking arga

alon-alon kasaput siliring angin samirana

dijogedi wit-witan jati mahoni sengon lan trembesi

sarta ocehe manuk kutut lan derkuku peksi peking glathik

kukila prenjak kacer cemblek tledekan jalak thilang lan podhang

rawat-rawat keprungu sulinge bocah-bocah angon sapi

sinambi ngarit suket lan tetembangan panglipuring ati

Sda, Des 2006

Impenku Durung Dadi Kanyatan

impenku durung dadi kanyatan

isih ngambah langit nalika tumurune udan sepisanan ing alas roban kang kebak eri bebondhotan

eling nalika kuwi

lungguh ijen ing sandhuwure amben sinambi nggagas gilar-gilar gumelaring jagad kanyatan

banjur kawejang simbah sing wis kawuri

dititipi udheng poleng lan jarik lurik

digladhi ngelmu kanuragan sejati

diwenehi kawruh ngeja aksara lan kasusastran jawi

diparingi ageman keris upih tilam sari

dhuh gusti, geneya saiki wus lali ?!

impenku durung dadi kanyatan

isih mecaki bumi sanyari baka sanyari

adhus kringet lan welas asihing sesami

(ing perenging gunung kelud rawat-rawat keprungu ngrangin

swara gambang lan suling saka pring isih dumeling minangka pepeling)

sda : Peb, 2012

Pitakon-Pitakon Kang Isih Kumleyang Kabur Kanginan Katiyub Angin lan Ginawa Grimise Udan

thole, anak lanang nandur kacang wohe sakranjang,

delengen langite obah-obah, jagade tambah nggladrah,

wong-wong bodho padha pating blasah, kena bebendu lan masalah.

apa isih wani, kowe ngranggeh lintang mecaki langit kang kebak panantang ?!

gendhuk, anak wedok nandur lombok wohe satenggok,

delengen bantalane nela-nela, kasatan tirta kesepening rasa,

awit wong budi candhala anjarah rayah angrudha peksa tanpa tata tanpa krama.

Apa isih wani, kowe nandur wiji pari senadyan sauli kanggo cadhonge pangan ing tembe mburi ?!

Sda

Jan '12